محبت میں کوئی بھی المیہ اچھا نہیں لگتا
وفا کے باب میں بھی تجزیہ اچھا نہیں لگتا

ہمیں اچھا تو لگتا ہے جِگر کے درد کو چُھونا
مگر یہ درد جس نے بھی دیا،اچھا نہیں لگتا

تمہیں ضِد ہے بجھانے کی،جلانا خُو ہماری ہے
ہمیں بھی طاق پر بجھتا دیا اچھا نہیں لگتا

نئے رستے بنا کر ان پہ چلنا اپنی فطرت ہے
کسی نے جب انہیں اپنا لیا، اچھا نہیں لگتا

بلا سے شہر سارا مے کو، مے خانوں کو پی جائے
مگر یہ زہر اس نے بھی پیا، اچھا نہیں لگتا

ہمارے سر پہ رکھ کر ہاتھ اس نے جو قسم کھائی
پھر اس کو توڑ کر بھی وہ جیا، اچھا نہیں لگتا

حسن و جمال کے بھی زمانے نہیں رہے
آنکھوں میں اس کی خواب سہانے نہیں رہے

ملنے کو آہی جاتا ہے ہر چند روز بعد
لگتا ہے اس کے پاس بہانے نہیں رہے

لرزش ہے ہاتھ میں تو نظر بھی ہے دُھندلی
پہلے سے اب وہ دل کے نشانے نہیں رہے

اُٹھتی نہیں ہیں شوق و تجسّس کے باوجود
آنکھوں کے کتنے کام پرانے نہیں رہے

کمرے سب بھر گئے ہیں مسائل کی گرد سے
دل میں تیرے خیال کے خانے نہیں رہے

میں آسماں کی شاخ پہ زندہ ہوں دوستو
چمکار کر بلاؤ، پرندہ ہوں دوستو

اب کے فساد نے مجھے یہ بھی بتا دیا
میں آدمی نہیں ہوں، درندہ ہوں دوستو

تم جن کے نیچے بیٹھ کے اوتار ہو گئے
ان برگدوں کا میں بھی پرندہ ہوں دوستو

اخبار میں خبر مر ے مرنے کی چھپ گئی
میں چیختا رہا کہ میں زندہ ہوں دوستو

سچ یہ ہے میری بابری مسجد مُجھی میں ہے
اور میں خُدا کے فضل سے زندہ ہوں دوستو

میرا غرور، تجھے کھو کے، ہار مان گیا
مَیں چوٹ کھا کے مگر اپنی قدر جان گیا

کہیں افق نہ ملا میری دشت گردی کو
مَیں تیری دھن میں بھری کائنات چھان گیا

خدا کے بعد تو بے انتہا اندھیرا ہے
تیری طلب میں کہاں تک نہ میرا دھیان گیا

جبیں پہ بل بھی نہ آیا گنوا کے دونوں جہاں
جو توُ چِھنا، تو مَیں اپنی شکست مان گیا

بدلتے رنگ تھے تیری امنگ کے غماّز
توُ مجھ سے بچھڑا، تو مَیں تیرا راز جان گیا

خوُد اپنے آپ سے مَیں شکوہ سنج آج بھی ہوُں
ندیم، یوُں تو مجھے اِک جہان مان گیا

دوست بن کر بھی نھیں ساتھ نبھانے والا
وھی انداز ھے ظالم کا زمانے والا

اب اسے لوگ سمجھتے ھیں گرفتار میرا
سخت نادم ھے مجھے دام میں لانے والا

کیا کہیں کتنے مراسم تھے ھمارے اس سے
وہ جو اک شخص ھے منہ پھیر کے جانے والا

تیرے ھوتے ھوئے آ جاتی تھی ساری دنیا
آج تنھا ھوں تو کوئی نھیں آنے والا

منتظر کس کا ھوں ٹوٹی ھوئی دھلیز پہ میں
کون آئے گا یہاں کون ھے آنے والا

میں نے دیکھا ھے بہاروں میں چمن کو جلتے
ھے کوئی خواب کی تعبیر بتا نے والا

کیا خبر تھی جو میری جان میں گھلا ھے اتنا
ھے وھی مجھ کو سر -دار لانے والا

تم تکلف کو بھی اخلاص سمجھتے ھو فراز
دوست ھوتا نھیں ھر ھاتھ ملانے والا