جانے کس سمت سے آیا ہوُں، کدھر جاتا ہوُں
Verses
جانے کس سمت سے آیا ہوُں، کدھر جاتا ہوُں
کوئی پوُچھے تو یہ کہتا ہوُں کہ گھر جاتا ہوُں
مَیں جو ظلمات سے درّانہ گُزر جاتا ہوُں
برگِ گُل خاک پہ گرتا ہے تو مر جاتا ہوُں
مَیں فرشتوں کو بھی خاطر میں نہ لاؤں، لیکن
اپنا جب سامنا کرتا ہوُں تو ڈر جاتا ہوُں
ساری دُنیا سے الگ ہے میرا سستانا بھی
خار چھُبتا ہے تو پَل بھر کو ٹھہر جاتا ہوُں
مُجھ پہ تہمت ہے کہ مَیں کچھ بھی نہیں کر پاتا
چیخ کر، دشت کو سنسان تو کر جاتا ہوُں
مَیں سمندر ہوُں، جو کرتا نہیں توہینِ وفا
چاند کے ساتھ ہی، ساحل سے اُتر جاتا ہوُں
پھوُل سا میرا مقدّر ہے، کہ مَیں بھی تو ندیم
صُبح کھِلتا ہوُں مگر شام بِکھر جاتا ہوُں