وجود کیا ہے عدم کیا ہے کچھ نہ تھا معلوم
میں رُوبرو تھا کسی کے ‘ تھا کون‘ کیا معلوم

یہ کائنات ہے اُس کی تو پھر ہے اپنا کیا
وہ ساتھ رہ کے بھی کیوں ہو علیحدہ معلوم

کسی سے کچھ نہ کہوں، اپنے آپ ہی میں رہوں
یہ عشق ہی کا ہو سارا کیا دھرا معلوم

اگر خیال میں تشکیک اور تضاد نہ ہو
خدا نہیں کہ خدا ہے ‘ ہو یہ ذرا معلوم

تری حیات وہی ہو تری نجات وہی
اگر تجھے ہو کبھی غم شہید کا معلوم

بہائے پیاسوں کی جانب جو پانیوں کو ظفر
روانیوں سے ہو خاص، اُس کا رابطہ معلوم

کوئی تو ترکِ مراسم پہ واسطہ رہ جائے
وہ ہم نوا نہ رہے صورت آشنا رہ جائے

عجب نہیں کہ مِرا بوجھ بھی نہ مُجھ سے اُٹھے
جہاں پڑا ہے زرِ جاں وہیں پڑا رہ جائے

میں سوچتا ہوں مجھے انتظار کس کا ہے
کواڑ رات کو گھر کا اگر کُھلا رہ جائے

کسے خبر کہ اسی فرش ِ سنگ پر سو جاؤں
مِرے مکاں میں بستر مرا بچھا رہ جائے

ظفر ہے بہتری اس میں کہ میں خموش رہوں
کُھلے زبان تو عزت کسی کی کیا رہ جائے

کھدائی کو کھنڈر کوئی نہیں ہے
اب اِس مٹی میں زر کوئی نہیں ہے

خیالوں میں یہ کس کی دستکیں ہیں
اگر بیرون ِ در کوئی نہیں کوئی نہیں ہے

وہاں لوگوں کے کیا دُکھ درد ہونگے
جہاں اب نوحہ گر کوئی نہیں ہے

کسے ہے بات کہنے کا سلیقہ
اگرچہ بے ہنر کوئی نہیں ہے

جِدھر چاہو نکل جاؤ سفر کو
فصیلِ بحر و بر کوئی نہیں ہے

میں کیوں اب گھر کی تختی پر نہ لکھ دوں
یہاں صابر ظفر کوئی نہیں !!!!

گُریز پا ہے جو مجھ سے ، اُسی کے پاس بہت ہوں
میں اپنے وعدے پہ قائم ہوں ، اور اُداس بہت ہوں

یہ قید وہ ہے، کہ زنجیر بھی نظر نہیں آتی
یہ پیرہن ہے کچھ ایسا کہ بے لباس بہت ہوں

نہیں شریک ِسفر وہ ، مگر ملال بہت ہے
کہ جس مقام پہ بھی ہوں ، میں اُس کی آس بہت ہوں

خموش اس لیے رہتا ہوں ، میرے سامنے تُو ہے
میں کم سخن سہی ، لیکن نظر شناس بہت ہوں

کٹا ہے وقت ، فقط زندگی نہیں کہ ظفر میں
طلب سے اور تغافل سے ، روشناس بہت ہوں

تم اپنے گرد حصاروں کا سلسلہ رکھنا
مگر ہمارے لیے کوئی راستہ رکھنا

ہزار سانحے پردیس میں گزرتے ہیں
جو ہو سکے تو ذرا ہم سے رابطہ رکھنا

خزاں رکھے گی درختوں کو بے ثمر کب تک
گذر ہی جائے گی یہ رُت بھی، حوصلہ رکھنا

تمہارے ساتھ سدا رہ سکیں ، ضروری نہیں
اکیلے پن میں کوئی دوست دوسرا رکھنا

زیادہ دیر ظفر ظلم رہ نہیں سکتا
اگر اب آئیں دن کڑے تو جی بڑا رکھنا

بکھرتا پھول جیسے شاخ پر اچھا نہیں لگتا
محبت میں کوئی بھی عمر بھر اچھا نہیں لگتا

بکھرنے اور بھٹکنے کے لیے تنہائی کافی ہے
کوئی منزل نہ ہو تو ہمسفر اچھا نہیں لگتا

میں اس کو سوچتا کیوں ہوں اگر ندرت نہیں اس میں
میں اس کو دیکھتا کیوں ہوں اگر اچھا نہیں لگتا

اسی باعث میں تیری یادوں میں مصروف رہتا ہوں
مجھے بے دھیان رہنے کا ہنر اچھا نہیں لگتا

وہ جس کی دلکشی میں غرق ہونا چاہتا ہوں میں
وہی منظر مجھے بارِ دگر اچھا نہیں لگتا

کسی صورت تعلق کی مسافت طے تو کرنی ہے
مجھے معلوم ہے تجھ کو سفر اچھا نہیں لگتا

مرا دکھ بانٹنے والے بہت احباب ہیں میرے
رکھوں میں ساتھ کوئی نوحہ گر، اچھا نہیں لگتا

نکل کے جب میں ویرانے سے آبادی میں آیا ہوں
رہوں بے گانہء دیوار در اچھا نہیں لگتا

ہزار آوارگی ہو، بے ٹھکانہ زندگی کیا ہے
وہ انساں ہی نہیں ہے جس کو گھر اچھا نہیں لگتا

نئی تخلیق سے باقی جہاں میں حسن ہے سارا
شجر چاہے کوئی ہو، بے ثمر اچھا نہیں لگتا

وہ چاہے فصل پک جانے پہ سارے کھیت چگ جائیں
پرندوں کو کروں بے بال و پر، اچھا نہیں لگتا

ستم جو ہو رہا ہے در حقیقت وہ خدا جانے
مگر کوئی سرے سے بے خبر اچھا نہیں لگتا

وہ اک اسم مبارک دل پہ لکھنا چاہیئے جس کو
وہ پیشانی پہ لکھ تو لوں مگر اچھا نہیں لگتا

وسیلہ راستے کا چھوڑ کر منزل نہیں ملتی
خدا اچھا لگے کیا ، جب بشر اچھا نہیں لگتا

کیا ہے یہ زندگی، یہ سخن ذات ہی سے ہے
اپنا معاملہ تو خیالات ہی سے ہے

دن بھر تو مجھ کو رونق ِدنیا رکھے بحال
دل جو بُجھا ہوا ہے، فقط رات ہی سے ہے

مضمون باندھنے کا بہت شوق ہے مجھے
اور اس کا واسطہ میرے جذبات ہی سے ہے

اِس برتری میں کوئی تکبر ہو ،کیا مجال!
اپنی غرض تو صرف تیری مات ہی سے ہے

ہم جو ظفر کسی نہ کسی کے اثر میں ہیں
وابستگی ہماری طلسمات ہی سے ہے

میں جس کے ساتھ ظفر عمر بھر اٹھا بیٹھا
وہ جانے آج ہے کیوں اجنبی بنا بیٹھا

شکایت اس سے نہیں اپنے آپ سے ہے مجھے
وہ بے وفا تھا تو میں آس کیوں لگا بیٹھا

جو میرے واسطے بنیاد تھا محبت کی!
میں اس خیال کی دیوار ہی گِرا بیٹھا

ملا وہ رات مجھے محفلِ مسرت میں
تو میں ادب سے نہیں ، دکھ سے دُور جا بیٹھا

طفر بتاؤ اسے ہاتھ کیا لگا سکتا!
جسے میں دیکھ کے بینائی ہی گنوا بیٹھا

کبھی فلک کو پڑا دل جلوں سے کام نہیں
اگر نہ آگ لگادوں تو داغ نام نہیں

وفور یاس نے یہاں کام ہے تمام کیا
زبان یار سے نکلی تھی نا تمام نہیں

وہ کاش وصل کے انکار پر ہی قائم ہوں
مگر انہیں تو کسی بات پر قیام نہیں

الہٰی تو نے حسینوں کو کیوں کیا پیدا
کچھ ان کی ذات سے دنیا کا انتظام نہیں

سنائی جاتی ہیں در پردہ گالیاں مجھ کو
جو میں کہوں تو کہیں آپ سے کلام نہیں

وہ آئیں گے شب وعدہ، یقیں نہیں اے دل
چراغ گھی کے جلاؤں ، یہ ایسی شام نہیں

سوائے جور و جفا، ماورائے بغض و دغا
بتوں کے واسطے دنیا میں کوئی کام نہیں

پیئوں ، پلاؤں تجھے، دور ہی سے ترساؤں
یہ روز عید ہے زاہد، مہ صیام نہیں

دباؤ کیا ہے، سنے وہ جو آپ کی باتیں
رئیس زادہ ہے داغ، آپ کا غلام نہیں

پھرا ہوا جو کسی کی نظر کو دیکھتے ہیں
لگا کے تیر ہم اپنے جگر کو دیکھتے ہیں

نظر چرا کے وہ یوں ہر جگر کو دیکھتے ہیں
کسی کو یہ نہیں ثابت کدھر کو دیکھتے ہیں

بنے ہوئے ہیں وہ محفل میں صورتِ تصویر
ہر ایک کو یہ گمان ہے ، اِدھر کو دیکھتے ہیں

فروغِ ماہ کہاں یہ شبِ جدائی میں
چراغ لے کے فرشتے سحر کو دیکھتے ہیں

تمہارے پاس کہیں بھول کر نہ آیا ہو
ہمیں تلاش ہے ،ہم نامہ بر کو دیکھتے ہیں

ہمیں گمان یہ ہوتا ہے، ہم کو روتا ہے
کسی جگہ جو کسی نوحہ گر کو دیکھتے ہیں

خیالِ بعدِ فنا بھی ہے دوست دشمن کا
ہم آنکھ بند کئے ہر بشر کو دیکھتے ہیں

الہٰی آج ہی پورا ہو وعدہء دیدار
نہیں تو اور کسی جلوہ گر کو دیکھتے ہیں

بنی ہوئی ہے لفافے پہ خط کی آنکھ اپنی
قدم قدم روش ِنامہ بر کو دیکھتے ہیں

مقامِ رشک ہوا عرصہء قیامت بھی
تجھی کو دیکھتا ہے ،جس بشر کو دیکھتے ہیں

یہ شک ہے تنِ لاغر سے ناتوانوں کے
وہ کھینچ کھینچ کے اپنی کمر کو دیکھتے ہیں

بتوں کے واسطے دنیا نہیں ہے جنت ہے
بہشت دیکھتے ہیں،جس کے گھر کو دیکھتے ہیں

حیا تو دیکھئے، آئینے سے بھی پردہ ہے
وہ اپنے ہاتھ سے پہلے سحر کو دیکھتے ہیں

خدا کرے سر محشر وہ بت ہو بےپردہ
کہ ہم بھی دیکھتے ہیں، سب کدھر کو دیکھتے ہیں

نکل نہ آئے کہیں داغِ آرزو، ڈر ہے
وہ چیر کر مرے زخم جگر کو دیکھتے ہیں

کسی سے کچھ نہیں مطلب کہ دیکھنے والے
تمہاری آنکھ، تمہاری نظر کو دیکھتے ہیں

سکندر آئینہ اے داغ جامِ جم دیکھے
ہم اپنے خسرو والا گھر کو دیکھتے ہیں