جواں ملکہ نے جب بیٹا جنا تھا
اُسی دن بادشہ اندھا ہوا تھا

محلوں میں ضیافت اڑ رہی تھی
بھکاری شہر میں بھوکا رہا تھا

نہیں تھا اُس طرف تیراک کوئی
جدھر سیلاب کا پانی بڑھا تھا

تری بیماری کے خط مل رہے تھے
میں کالج کے جھمیلوں میں پڑا تھا

میں دادا جان کی ٹوٹی لحد کو
اٹھارہ سال سے بھولا ہوا تھا

رفیق سندیلوی

مری تحریک سے پیدا ہوا تھا
کہ میں پُرکار تھا وہ دائرہ تھا

ہماری گائیاں ڈکرا رہی تھیں
تھنوں میں دودھ جامد ہو گیا تھا

کسی نے بت کے ٹکڑے کر دیے تھے
عبادت گاہ میں اک شور سا تھا

مری ماں مجھکو باہر ڈھونڈتی تھی
میں اپنے گھر کے ملبے میں دبا تھا

مجھے دو نیلی آنکھیں روکتی تھیں
مگر میں کالے پانی جا رہا تھا

رفیق سندیلوی

چٹانوں سے سمندر پوچھتا تھا
یہ شب کو کس کا بجرا ڈوبتا تھا

یہ کیا آواز تھی لہروں کے اندر
یہ کیسا شور موجوں میں بپا تھا

یہ کیسا ڈر لگا تھا پانیوں کو
کنارا کس لئے سہما ہوا تھا

کھلے تھے چاندنی کے بال کیونکر
ستارہ کیوں گریباں پھاڑتا تھا

یہ کیسی سسکیاں تھیں بادلوں میں
خلا میں کون دھاڑیں مارتا تھا

رفیق سندیلوی

حجاب اُس روز سارا اٹھ گیا تھا
تجھے بانہوں میں مَیں نے بھر لیا تھا

فشارِ لمس میں اُلجھی تھیں روحیں
شجر سے اژدہا لپٹا ہوا تھا

تِری شریانیں بھی جلنے لگی تھیں
مرا خوں بھی رگوں میں کھولتا تھا

بہشتی پھل دھرے تھے طشری میں
کوئی بابِ تلذذ کھل گیا تھا

تھپکتا تھا ہماری پُشت بادل
ستارہ پنڈلیاں سہلا رہا تھا

رفیق سندیلوی

شکاری جس جگہ مردہ پڑا تھا
وہ جنگل کا نشیبی راستہ تھا

ِادھر کھیتوں میں گیڈر رو رہے تھے
اُدھر باڑے میں کُتا بھونکتا تھا

تلاش اُس کو بھی کالے ریچھ کی تھی
مجھے بھی کوئی چیتا ڈھونڈنا تھا

اُسی کوئے کے بچے گم ہوئے تھے
جو اک چڑیا کے انڈے کھا گیا تھا

گھنے پیڑوں پہ بندر کُودتے تھے
کوئی خرگوش جھاڑی میں چھپا تھا

رفیق سندیلوی

کسی گھاٹی کے اندر جا رہا تھا
مرے پاؤں تلے جو راستہ تھا

گھروں میں پھر بھی چوری ہو گئی تھی
اگرچہ شہر پر پہرا کڑا تھا

مری باتوں میں لکنت آگئی تھی
روانی سے مگر وہ بولتا تھا

نگر کو عاجزی کا درس دے کر
وہ خود فرعون بنتا جا رہا تھا

خطا اس سے بھی ہو سکتی تھی کوئی
خمیر اس کا بھی مٹی سے اٹھا تھا

رفیق سندیلوی

میں جس لمحے ترا دُولہا بنا تھا
وہ لمحہ سات رنگا ہو گیا تھا

مرے کپڑے بھی اچھے لگ رہے تھے
تجھے بھی سرخ جوڑا سج رہا تھا

تری سکھیاں بھی تجھ کو چھیڑتی تھیں
مجھے بھی دوستوں کا سامنا تھا

تجھے ماں باپ رخصت کر رہے تھے
تری آنکھوں سے دریا بہ رہا تھا

قدم جب تو نے ڈولی میں رکھے تھے
ہوا میں کوئی نغمہ گھل گیا تھا

رفیق سندیلوی

جمورا خون میں نہلا گیا تھا
مداری اپنی چھاتی پیٹتا تھا

سبھی پیروں نے مٹی چھوڑ دی تھی
اکیلا ریچھ چرخہ کاتتا تھا

ٹکا کر ڈگڈگی پر گال اپنے
خلا کی سمت بندر دیکھتا تھا

گلے کی کھردری رسی چھڑا کر
زمیں پر بکرا ٹکر مارتا تھا

کہیں اک کاٹھ کی گڑیا پڑی تھی
کہیں خیرات کا کپڑا بچھا تھا

رفیق سندیلوی

ہمیں نے سنگسار اس کو کیا تھا
وہ زانی اس زمیں پر بوجھ سا تھا

اداسی میں نے خود تخلیق کی تھی
مجھے جو دکھ بھی تھا خود ساکتہ تھا

میں وہ ظالم تھا جس نے بچپنے میں
خود اپنے آپ کو اغوا کیا تھا

مساجد میں عبادت ہو رہی تھی
دلوں میں پھر بھی کوئی وسوسہ تھا

تری چاندی بھی میلی ہو گئی تھی
مری مے میں بھی پانی مل گیا تھا

رفیق سندیلوی

کسی کُرے پہ اُلو بولتا تھا
خلا چمگادڑوں سے بھر گیا تھا

فلک سے مکڑیاں چمٹی ہوئی تھیں
زمیں پر کیکڑا چپکا ہوا تھا

ستاروں کو بھی دیمک کھا رہی تھی
سنہرے چاند کو بھی گھن لگا تھا

کرن پر چھپکلی اوندھی پڑی تھی
نیولا روشنی سے لڑ رہا تھا

اندھیرا کیچوے کی چال چل کر
ہوا کے پیٹ میں داخل ہوا تھا

رفیق سندیلوی