Dagh Dehlvi

warning: Creating default object from empty value in /home/freeurdupoetry/public_html/modules/taxonomy/taxonomy.pages.inc on line 33.
داغ دھلوی
Lubna's picture

اس ادا سے وہ وفا کرتے ہیں

اس ادا سے وہ وفا کرتے ہیں
کوئی کیا جانے کے وفا کرتے ہیں
ہم کو چھوڑو گے تو پچھتاؤ گے
ہنسنے والوں سے ہنسا کرتے ہیں
یہ بتاتا نہیں کوئی مجھ کو
دل جو آ جے تو کیا کرتے ہیں
حسن کا حق نہیں رہتا باقی

IN Khan's picture

وہ ہوئے مہربان دشمن پر

وہ ہوئے مہربان دشمن پر
پھٹ پڑے آسمان دشمن پر

جان اس بے وفا کو ہم نے دی
جس کی جاتی ہے جان دشمن پر

اپنی پہچان کو قیامت میں
کیجئے کچھ نشان دشمن پر

بہت اچھی ہے آپ کی تلوار
کیجئے امتحان دشمن پر

لوگ کہتے ہیں کیا؟ سنو تو سہی
جھک پڑا اک جہان دشمن پر

کس کی محفل میں یہ ہوئی عزت
کیا برستی ہے شان دشمن پر

تم نے بھی کچھ سنا؟ کہ ہے چرچا
غش ہے اک نوجوان دشمن پر

اب برسنے لگے وہ ہم پر بھی
کھل گئی ہے زبان دشمن پر؟

داغ تم دل کو دوست سمجھے ہو
دوستی کا گمان دشمن پر؟

IN Khan's picture

وصل میں جھوٹی تسلی کے سوا کیا ہوگا

وصل میں جھوٹی تسلی کے سوا کیا ہوگا
بہت اچھا، بہت اچھا، بہت اچھا ہوگا

دلِ افسردہ کا جب حال بیاں ان سے کیا
پھول کو مَل کے کہا ہاتھ میں، ایسا ہوگا

نگہء شوق کی خواہش کو سمجھ لو دل میں
ورنہ دو چار گھڑی بعد تقاضا ہوگا

تم کسی کے نہ ہوئے ہو، نہ کسی کے ہوگے
دل کسی کا نہ ہوا ہے، نہ کسی کا ہوگا

خوبیاں داغ کی جب اس نے سُنیں، سُن کے کہا
کیا غرض ہم کو، وہ اپنے لئے اچھا ہوگا

IN Khan's picture

نہ آیا نامہ بر اب تک، گیا تھا کہہ کے اب آیا

نہ آیا نامہ بر اب تک، گیا تھا کہہ کے اب آیا
الٰہی کیا ستم ٹوٹا، خدایا کیا غضب آیا

رہا مقتل میں بھی محروم، آب تیغِ قاتل سے
یہ ناکامی کہ میں دریا پہ جا کر تشنہ لب آیا

غضب ہے جن پہ دل آئے، کہیں انجان بن کر وہ
کہاں آیا، کدھر آیا، یہ کیوں آیا، یہ کب آیا؟

شروعِ عشق میں گستاخ تھے، اب ہیں خوشامد کو
سلیقہ بات کرنے کا نہ جب آیا، نہ اب آیا

نوشتہ میرا بے معنی تو دل بے مدعا میرا
مگر اس عالمِ اسباب میں میں بے سبب آیا

بسَر کیونکر کریں گے خلد میں ہم واعظِ ناداں
ہمارے جدِ امجد کو نہ واں رہنے کا ڈھب آیا

وہ ارماں حسرتیں جس کی، اگر نکلا تو کب نکلا؟
وہ جلوہ خواہشیں جس کی، نظر آیا تو کب آیا؟

ابھی اپنی جفا کو کھیل ہی سمجھا ہے تُو ظالم
کہ جینے پر نہ آیا، میرے مرنے پر عجب آیا

گیا جب داغ مقتل میں، کہا خُوش ہو کے قاتل نے
مرا آفت نصیب آیا، مرا ایذا طلب آیا

IN Khan's picture

جب کہا اور بھی دنیا میں حسیں اچھے ہیں

جب کہا اور بھی دنیا میں حسیں اچھے ہیں
کیا ہی جھنجلا کے وہ بولے کہ ہمیں اچھے ہیں

نہ اُٹھا خواب عدم سے ہمیں ہنگامہء حشر
کہ پڑے چین سے ہم زیرِ زمیں اچھے ہیں

کس بھروسے پہ کریں تجھ سے وفا کی اُمید
کون سے ڈھنگ ترے جان حزیں اچھے ہیں

خاک میں آہ ملا کر ہمیں، کیا پوچھتے ہو
خیر جس طور میں ہم خاک نشیں اچھے ہیں

ہم کو کوچے سے تمہارے نہ اُٹھائے اللہ
صدقے بس خلد کے کچھ ہم تو یہیں اچھے ہیں

نہ ملا خاک میں، تو ورنہ پشیماں ہوگا
ظلم سہنے کو ہم اے چرخ بریں اچھے ہیں

دل میں کیا خاک جگہ دوں ترے ارمانوں کو
کہ مکاں ہے یہ خراب اور مکیں اچھے ہیں

مجھ کو کہتے ہیں رقیبوں کی بُرائی سن کر
وہ نہیں تم سے بُرے بلکہ کہیں اچھے ہیں

بُت وہ کافر ہیں کہ اے داغ خدا اُن سے بچائے
کون کہتا ہے یہ غارتگر دیں اچھے ہیں

IN Khan's picture

جس وقت آئے ہوش میں کچھ بیخودی سے ہم

جس وقت آئے ہوش میں کچھ بیخودی سے ہم
کرتے رہے خیال میں باتیں اُسی سے ہم

ناچار تم ہو دل سے، تو مجبور جی سے ہم
رکھتے ہو تم کسی سے محبت، کسی سے ہم

یوسف کہا جو اُن کو تو ناراض ہوگئے
تشبیہ اب نہ دیں گے کسی کو کسی سے ہم

ہوتا ہے پُرضرور خوشی کا مآل رنج
رونے لگے اخیر زیادہ ہنسی سے ہم

کہتے ہیں آنسوؤں سے بجھائیں گے ہم تجھے
یہ دل لگی بھی کرتے ہیں دل کی لگی سے ہم

کے دن ہوئے ہیں ہاتھ میں ساغر لئے ہوئے
کس طرح توبہ کر لیں الہٰی ابھی سے ہم

ہم سے چھپے گا عشق! یہ کہنے کی بات ہے؟
کیا کچھ بُری بھلی نہ کہیں گے کسی سے ہم؟

معشوق کی خطا نہیں عاشق کی ہے خطا
جب غور کر کے دیکھتے ہیں منصفی سے ہم

دشمن کی دوستی سے کیا قتل دوست نے
دعویٰ کریں گے خوں کا اب مدعی سے ہم

واعظ خطا معاف کہ انساں ہم تو ہیں
بن جائیں گے فرشتہ نہ کچھ آدمی سے ہم

جس کو نہیں نصیب بڑا بد نصیب ہے
کھاتے ہیں ترے عشق کا غم کس خوشی سے ہم

خلوت گزیں رہے ہیں تصّور میں اس قدر
معلوم ہوں گے حشر میں بھی اجنبی سے ہم

غیروں سے التفات پہ ٹوکا تو یہ کہا
دنیا میں بات بھی نہ کریں کیا کسی سے ہم

کرتے ہیں ایسی بات کہ کہہ دے وہ دل کی بات
یوں مدّعا نکالتے ہیں مدّعی سے ہم

دل کچھ اُچاٹ سا ہے ترے طور دیکھ کر
وہ بات کر کہ پیار کریں تجھ کو جی سے ہم

عادت بُری بلا ہے یہ چھٹتی نہیں کبھی
دنیا کے غم اُٹھاتے ہیں کس کس خوشی سے ہم

وعدہ کیا ہے اُس نے قیامت میں وصل کا
اپنا وصال چاہتے ہیں لو ابھی سے ہم

کرتے ہیں اک غرض کے لیئے اُس کی بندگی
بن جائیں گے غلام نہ کچھ بندگی سے ہم

ان بن ہوئی ہو غیر سے اُس کی خدا کرے
سنتے ہیں لاگ ڈانٹ کسی کی کسی سے ہم

دل گیر اس قدر ہیں کہ جا جاکے باغ میں
دل کو ملا کے دیکھتے ہیں ہر کلی سے ہم

کہتے ہیں وہ ستم میں ہمارے ہے خاص لطف
یہ دشمنی بھی کرتے ہیں اک دوستی سے ہم

کم بخت دل نے داغ کیا ہے ہمیں تباہ
عاشق مزاج ہو گئے آخر اِسی سے ہم

IN Khan's picture

ہوش آتے ہی محو ہوگئے ہم

ہوش آتے ہی محو ہوگئے ہم
جب آنکھ کھُلی تو سو گئے ہم

پیری میں جواں ہوگئے ہم
جب صبح ہوئی تو سوگئے ہم

راحت سے عدم میں ہوگئے ہم
منزل پہ پہنچ کے سو گئے ہم

اُس بزم میں دل نے ساتھ چھوڑا
ایک آئے وہاں سے دو گئے ہم

کافر کہیں ہم کو یا مسلماں
اب ہو گئے جس کے ہوگئے ہم

جب زلف کی بو سُنگھائی تم نے
دیوانے تمہارے ہو گئے ہم

اب روئے گا ہم کو اک زمانہ
اگلوں کو جہاں میں ر و گئے ہم

محفل سے تری ملا یہ ہم کو
دل اپنی گرہ سے کھو گئے ہم

دل لینے کی تم کو آرزو تھی
اب جان سے اپنی لو گئے ہم

کل آئے جو وہ کہیں سے اے داغ
آج اُن کے سلام کو گئے ہم

IN Khan's picture

اپنے رونے پہ کچھ آیا جو تبسّم مجھ کو

اپنے رونے پہ کچھ آیا جو تبسّم مجھ کو
یاد نے اُس کی کہا بھول گئے تم مجھ کو

ہنستے ہنستے کبھی روتا ہوں تصّور میں ترے
روتے روتے کبھی آتا ہے تبسّم مجھ کو

کیوں گناہ لیتے ہیں تھوڑی سی پلانے والے
کل ملے کوثر اُسے آج جو دے خم مجھ کو

کیا کرے دیکھئے کوثر پہ مری تشنہ لبی
سوکھا جاتا ہے یہاں دیکھ کے قلزم مجھ کو

مسکرائے مری میّت پہ وہ منہ پھیر کے داغ
حشر تک یاد رہے گا یہ تبسّم مجھ کو

Syndicate content