بات کہنی تھی ایک بر موقع
Verses
بات کہنی تھی ایک بر موقع
وقت نے کب دیا مگر موقع
تم بہت سوچنے کے عادی ہو
تم گنواتے رہوگے ہر موقع
دل کی اک ایک بات رکھ دوں گا
مل گیا اب مجھے اگر موقع
جانے کب ہاتھ سے نکل جائے
زندگی کا یہ مختصر موقع
موسمِ ہجر میں برسنے کو
کم نہیں تم کو چشمِ تر موقع
تم نے تاخیر کردی آنے میں
اب کہاں میرے چارہ گر موقع
لگ رہا ہے کہ مل نہ پائے گا
تم سے ملنے کا عمر بھر موقع
روز فتنہ کوئی اٹھانے کا
ڈھونڈ لیتے ہیں فتنہ گر موقع
اہل دانش بھی اب کہاں راغب
بات کرتے ہیں دیکھ کر موقع