Qabil Ajmeri

وہ کب آئیں خدا جانے ستارو تم تو سوجا و
ہوئے ہیں ہم تو دیوانے ستارو تم تو سو جا و

کہاں تک مُجھ سے ہمدردی کہاں تک میری غمخواری
پزاروں غم ہیں انجانے ستارو تم تو سوجا و

ہمیں روئدادِ ہستی رات بھر میں ختم کرنی ہے
نہ چھیڑو اور افسانے ستارو تم تو سوجاو

ہمارے دیدہء بےخواب کو تسکین کیا دوگے
ہمیں لوٹا ہے دنیا نے ستارو تم تو سوجاو

اب یہ عالم ہے کہ غم کی بھی خبر ہوتی نہیں
اشک بہ جاتے ہیں لیکن آنکھ تر ہوتی نہیں

پھر کوئی کم بخت کشتی نذرِ طوفاں ہوگئی
ورنہ ساحل پر اُداسی اس قدر ہوتی نہیں

میری نظریں جرائتِ نظارہ کی مجرم سہی
احتیاطِ حُسن تم سے بھی مگر ہوتی نہیں

ہائے کس عالم میں چھوڑا ہے تمھارے غم نے ساتھ
جب قضا بھی زندگی کی چارہ گر ہوتی نہیں

رنگِ محفل چاہتا ہے اِک مکمل انقلاب
چند شمعوں کے بھڑکنے سے سحر پوتی نہیں

اضطرابِ دل سے قابل وہ نگاہِ بے نیاز
بے خبر معلوم ہوتی ہے مگر ہوتی نہیں

جانےکیا ہو پلک جھپکنے میں
زندگی جاگتی ہی رہتی ہے

لاکھ وہ بے نیاز ہوجائیں
حُسن میں دلکشی ہی رہتی ہے

جھوٹے وعد و ں کی دل کشی مت پوچھ
آنکھ در پر لگی ہی رہتی ہے

ہجر کی رات ہو کہ صبحِ نشاط
زندگی زندگی ہی رہتی ہے

دردِ خود آگہی نہ ہو جب تک
کائنات اجنبی ہی رہتی ہے

زہر بھی پم نے پی کے دیکھ لیا
عشق میںتشنگی ہی رہتی ہے

حُسن کرتا ہے مہر و ماہ سے چھیڑ
آنکھ لیکن جھکی ہی رہتی ہے

کچھ نئی بات تو نہیں قابل
ہجر میں بے کلی ہی رہتی ہے

تمھیں جو میرے غم. دل سے آگہی ہوجائے
جگر میں پھول کِھلیں ، آنکھ شبنمی ہوجائے

اجل بھی اُس کی بلندی کو چھو نہی سکتی
وہ زندگی جسے احساسِ زندگی ہوجائے

یہی ہے دل کی ہلاکت ، یہی ہے عشق کی موت
نگاہِ دوست پہ اظہارِ بیکسی ہوجائے

زمانہ دوست ہے کس کس کو یاد رکھوگے
خدا کرے کہ تمھیں مجھ سے دشمنی ہوجائے

سیاہ خانہء دل میں ہے ظلمتوں کا ہجوم
چراغِ شوق جلاو کہ روشنی ہوجائے

طلوعِ صبح پہ ہوتی ہے اور بھی نمناک
وہ آنکھ جس کی ستاروں سے دوستی ہوجائے

اجل کی گود میں قابل ہوئی ہے عمر تمام
عجب نہیں کہ مری موت زندگی ہوجائے

جب کبھی آنکھ ملاتے ہیں وہ دیوانے سے
روئے تاباں پہ اُبھر آتے ہیں ویرانےسے

لذ تِ گردش ایام وہی جانتے ہیں
جو کسی بات پہ اُٹھ آئے ہیں میخانے سے

تم بھی ایسے میں اُلٹ دو رُخ. تاباں سے نقاب
زندگی جھانک رہی ہےمرے پیمانے سے

لوگ لے آتے ہیں کعبہ سے ہزاروں تحفے
ہم سے اک بت بھی نہ لایا گیا بُت خانے سے

سوچتا ہوں تو وہ جاں سے بھی زیادہ بھی عزیز
دیکھتا ہوں تو نظر آتے ہیں بیگانے سے

ظمتِ دیر و حرم سے کوئی مایوس نہ ہو
اک نئی صبح ابھرنے کو ہےمیخانے سے

تیری اک سادہ نظر کا ہے کرشمہ ساقی
ان گنت رنگ جھلکنے لگے پیمانے سے

پھول تو پھول ہیں اس دورِ ہوس میں قابل
لوگ کانٹوں کو بھی چُن لیتے ہیں ویرانے سے

کوئے قاتل میں ہمیں بڑھ کے صدا دیتے ہیں
زندگی آج ترا قرض چکا دیتے ہیں

تیرے اخلاص کے افسوں ترے وعدوں کے طلسم
ٹوٹ جاتے ہیں تو کچھ اور مزا دیتے ہیں

ہاں یہی خاک بسر سوختہ ساماں اے دوست
تیرے قدموں میں ستاروں کو جھکا دیتے ہیں

سینہ چاکان محبت کو خبر ہے کہ نہیں
شہر خوبا ں کے درو بام صدا دیتے ہیں

ہم نے اس کے لب و رخسار کو چھو کر دیکھا
حوصلے آگ کو گلزار بنا دیتے ہیں

اعتبارِ نگاہ کر بیٹھے
کتنے جلوے تباہ کر بیٹھے

آپ کا سنگِ در نہیں چمکا
ہم جبینیں سیاہ کر بیٹھے

موت پر مسکرانے آئے تھے
زندگانی تباہ کر بیٹھے

شمع امید کے اُجالے میں
کتنی راتیں سیاہ کر بیٹھے

صرف عذرِ گناہ ہو نہ سکا
ورنہ سارے گناہ کر بیٹھے

کس توقع پہ اہلِ دل قابل
زندگی سے نباہ کر بیٹھے