جسے بھی دُھوپ بار آور لگی تھی
اُسے اک بانجھ پرچھائیں ملی تھی

تھکن کوئی مجھے کیا رنج دیتی
سڑک خود خستہ خستہ چل رہی تھی

میں اپنے آپ کو بھی چاہتا کیا
جہاں میں تھا وہاں بیگانگی تھی

عیاں تھی رہ گذر سے بھی جُدائی
مسافر کی جگہ دُھول اڑ رہی تھی

ظفر میں اِس لیے نغمہ سرا ہوں
مری ایجاد رونے سے ہوئی تھی

جبیں پہ دھوپ سی آنکھوں میں کچھ حیا سی ہے
تو اجنبی ہے مگر شکل آشنا سی ہے

خیال ہی نہیں‌ آتا کسی مصیبت کا
ترے خیال میں ہربات غم ربا سی ہے

جہاں میں یوں تو کسے چین ہے مگر پیارے
یہ تیرے پھول سے چہرے پہ کیوں‌ اداسی ہے

دلِ غمیں سے بھی جلتے ہیں‌شادمانِ حیات
اسی چراغ سے اب شہر میں‌ہوا سی ہے

ہمیں‌سے آنکھ چُراتا ہے اس کا ہر ذرہ
مگر یہ خاک ہمارے ہی خوں کی پیاسی ہے

ادس پھرتا ہوں میں جس کی دھن میں برسوں سے
یونہی سی ہے وہ خوشی بات وہ ذرا سی ہے

چہکتے بولتے شہروں کو کیا ہوا ناصر
کہ دن کو بھی مرے گھر میں وہی اداسی ہے

ہر نفس رنج کا اِشارہ ہے
آدمی دُکھ کا استعارہ ہے

مجھ کو اپنی حدوں میں رہنے دے
میں سمندر ہوُں توُ کنارا ہے

اجنبی! شب کو راستہ نہ بدل
توُ میری صُبح کا ستارا ہے

یا سماعت کی خود فریبی تھی
یا تیری یاد نے پکارا ہے

شامِ شب خوں نے دشت سے پوچھا
کس نے رختِ سفر اُتارا ہے

جانے کیوں سوگوار سناّٹا
موت کی زندگی سے پیارا ہے

عُمر بھر بے چَراغ رستوں میں
زِندگی نے ہمیں گزارا ہے

چاہتوں کی بِساط پر "محسن"
دل بڑی مُشکلوں سے ہارا ہے

لاغر اتنا ہوں کہ گر تو بزم میں جا دے مجھے
میرا ذمہ، دیکھ کر گر کوئی بتلا دے مجھے

کیا تعجب ہے کہ اُس کو دیکھ کر آجائے رحم
وا ں تلک کوئی کسی حیلے سے پہنچا دے مجھے

منہ نہ دکھلاوے، نہ دکھلا، پر بہ اندازِ عتاب
کھول کر پردہ ذرا آنکھیں ہی دکھلا دے مجھے

یاں تلک میری گرفتاری سے وہ خو ش ہے کہ مَیں
زلف گر بن جاؤں تو شانے میں اُلجھا دے مجھے