لوگ وابستہ ہیں اُس یارِ طرح دار کے ساتھ
اب بھی بیٹھے ہیں کئی سایۂ دیوار کے ساتھ

قیمتِ شوق بڑھی ایک ہی انکار کے ساتھ
واقعہ کچھ تو ہوا چشمِ خریدار کے ساتھ

ایسے لگتا ہے کسی دشت میں آ نکلے ہیں
کتنی الفت تھی ہمیں صحن کے اشجار کے ساتھ

ہر کوئی جان بچانے کے لیے دوڑ پڑا
کون تھا آخرِ دم قافلہ سالار کے ساتھ

ظلم سے ہاتھ اُٹھانا نہیں آتا ہے تو پھر
کچھ رعایت ہی کرو اپنے گرفتار کے ساتھ

حد سے بڑھ کر بھی تغافل نہیں اچھا ہوتا
کچھ تعلق بھی تو رکھتے ہیں پرستار کے ساتھ

میں ترے خواب سے آگے بھی نکل سکتا ہوں
دیکھ! مجھ کو نہ پرکھ وقت کی رفتار کے ساتھ

فصیلِ ذہن پہ سوچوں کا بھوت ہو جیسے
بدن کی بارہ دری میں سکوت ہو جیسے

بکھرے جسم میں قائم ہیں اس طرح آنکھیں
کسی محاذ پہ تنہا سپوت ہو جیسے

کچھ ایسے پیر زنِ وقت نے مجھے کاتا
مرا وجود بھی تکلے پہ سوت ہو جیسے

یہ کس کے ہجر میں بن باس لینے نکلے ہیں
تمام شہر کے تن پر بھبھوت ہو جیسے

جلوؤں کے تسلط سے مجھے ہوش نہیں ہے
پردہ تو یہی ہے کہ وہ روپوش نہیں ہے

گو حسن کی فطرت ہی وفا کوش نہیں ہے
اس پر بھی تو خالی کوئی آغوش نہیں ہے

اللہ رے محبت میں میری دیدہ دلیری
ہر جرم پہ کہتا ہوں مجھے ہوش نہیں

کیا جانئیے کیا سن کے چلا آیا ہے کوئی
اس طرح کہ آنچل بھی سر دوش نہیں ہے

الفت سے شکیل اب بھی تشنہ سوزش
بادہ ہے مگر بادہ سر جوش نہیں ہے

مہک اُٹھیں یہ فضائیں جو لب ہلائیں کبھی
ہمیں بھی چھیڑ کے دیکھیں تو یہ ہوائیں کبھی

یہ اِن لبوں ہی تلک ہے ابھی ضیا جن کی

بنیں گی نُور کے سوتے یہی صدائیں کبھی

وُہ خوب ہے پہ اُسے اِک ہمیں نے ڈھونڈا ہے
جو ہو سکے تو ہم اپنی بھی لیں بلائیں کبھی

کبھی تو موت کا یہ ذائقہ بھی چکھ دیکھیں
وُہ جس میں جان ہے اُس سے بچھڑ بھی جائیں کبھی

وہ حُسن جس پہ حسیناؤں کو بھی رشک آئے
اُسے بھی صفحۂ قرطاس پر تو لائیں کبھی

وہی کہ جس سے تکلّم کو ناز ہے ہم پر
وہ رنگ بھی تو زمانے کو ہم دکھائیں کبھی

ہمِیں پہ ختم ہے افسردگی بھی، پر ماجد
کھلائیں پھول چمن میں جو مسکرائیں کبھی