خود اپنے گرد ہی پھرتے ہیں ہم آہستہ آہستہ
کہ زائر کرتے ہیں طوف حر م آہستہ آہستہ

بہت آسان ہے کاغذ پہ کوئی لفظ لکھ دینا
دلوں پہ نام ہوتے ہیں رقم آہستہ آہستہ

کہیں پاؤں نہ تیرے کاٹ لے یہ برق رفتاری
مسافت میں اٹھا اپنے قدم آہستہ آہستہ

کہانی تو سنا کر داستاں گو ہو گیا رخصت
ہوئی ہے شہر بھر کی آنکھ نم آہستہ آہستہ

ابھی تو ہجر کے پہلے دکھوں نے دستکیں دی ہیں
سرایت خوں میں کرتا ہے یہ سم آہستہ آہستہ

موسموں کو نئے عنوان دیا کرتے ہیں
نذرِ صرصر بھی ہمیں برگ ہُوا کرتے ہیں

اپنے احساس نے اِک رُوپ بدل رکھا ہے
بُت کی صورت جِسے ہم پُوج لیا کرتے ہیں

اُن سے شکوہ؟ مری توبہ! وہ دلوں کے مالک
جو بھی دیتے ہیں بصد ناز دیا کرتے ہیں

ہم کہ شیرینیِ لب جن سے ہے ماجد منسُوب
کون جانے کہِ ہمیں زہر پِیا کرتے ہیں

تہمت اتار پھینکی، لبادہ بدل لیا
خود کو ضرورتوں سے زیادہ بدل لیا

جی چاہتا تھا روؤں اسے جاں سے مار کے
آنکھیں چھلک پڑیں تو ارادہ بدل لیا

جب دیکھا رہزنوں کی توجہ نہیں ادھر
شہزادگی سے خرقۂ سادہ بدل لیا

کیسے قبول کرتے مجسم غبار کو
منزل قریب آئی تو جادہ بدل لیا

یہ سوچ بھی کیسا دائرہ ہے
جو اپنے ہی راستے کاٹتا ہے

پہلے تو جنوں میں چل رہا تھا
ہوش آیا تو الٹا راستہ ہے

میں نرم اگرچہ ہوں بہت ہی
بھٹکوں تو بلا کا شائبہ ہے

خاموش رہا ہوں گو ہمیشہ
بولوں تو یہ تازہ سانحہ ہے

تبلیغ میں کرتا ہوں محبت
یہ عشق، بقا کا ضابطہ ہے

محفوظ گزرنا ہے یہاں سے
مہبوت ہوا کا قافلہ ہے

کیسے یہ کٹے گی سعد منزل
ٹوٹا خود سے رابطہ ہے